ZULU

AMALUNGELO ezingane

NGUBANI INGANE?

Ingane ngumuntu oneminyaka engaphansi kwe18 ubudala.

Umthetho omkhulu walapha eNingizimu Afrika, uMthetho-sisekelo, uqinisekisa ukuthi, bonke abantu, abaneminyaka engaphansi kwe18, banamalungelo ezingane. Ngakho-ke zonke izingane eNingizimu Afrika, kanye nezingane ezivela kwamanye amazwe, zinamalungelo.

YIMAPHI AMALUNGELO IZINGANE EZINAWO?

• Izingane zinelungelo lokuba yizingane.
• Izingane zinelungelo lokunakekelwa ngabazali bazo, umndeni nabahlinzeka ngokunakekela.
• Izingane zinelungelo lokuthola ukudla okwanele ukuze zihlale ziphilile.
• Izingane zinelungelo lokuthola ukunakekelwa okuphambili kwezempilo/kwezokwelashwa uma zigula.
• Izingane zinelungelo lokuvikelwa ekulinyazweni, zikhuseliseke futhi zizizwe ziphephile.
• Izingane zinelungelo lokufunda.
• Izingane ezikhubazekile zinelungelo lokunakekelwa ngokukhethekile.
• Izingane zinelungelo lokukhuluma futhi zizwakale.

IZINGANE ZINELUNGELO LOKUVIKELWA

• Uhulumeni kanye namaphoyisa kufanele benze konke okusemandleni ukuvikela izingane kubantu, okumbandakanya nabazali bazo, abazilimazayo.
• Uhulumeni kufanele alekelele ekuvikeleni izingane kulo lonke udlame lomzimba lokwengqondo, ukulimala noma ukuhlukunyezwa.
• Izingane eziphambana nomthetho zinelungelo lokuphathwa ngendlela ekhethekile.
• Izingane zinelungelo lokuvikelwa ezimweni zempi.
• Izingane zinelungelo lokuvikelwa ekunganakelelweni, ukuhlukunyezwa kanye nokujeziswa okwehlisa isithunzi ngabazali bazo nabahlinzeka ngokunakekela.
• Izingane zinelungelo lokudlala futhi zingenzi umsebenzi wabantu abadala; zinelungelo lokuvikelwa ekusetshenzisweni zisencane - kanye nasekuphoqweni ukuthi zisebenze ukuthi zenzele abanye abantu imali.
• Izingane zinelungelo lokuvikelwa kuzo zonke izinhlobo zokuxhashazwa nokuhlukunyezwa ngokocansi.
• Izingane zinelungelo lokuvikelwa kulezo zinto ezilimazayo nezidakamizwa. Izingane kufanele zivikelwe ekusetshenzisweni ukwenza noma ekuhwebeni ngezidakamizwa.

YINI UKUHLUKUNYEZWA KWENGANE?

• Ukuhlukunyezwa ngokocansi
• Ukuphoqa ingane ukuthi ikuthinte
• Ukukhombisa ingane imifanekiso yocansi.
• Ukuthinta ingane lapho ingafuni ukuthintwa khona nalapho kungafanele khona.
• Ukuhlukumeza ingane ngokomzimba
• Ukushaya noma ukulimaza ingane - noma ukudubela enganeni.
• Ukuhlukumeza ingane ngokomphefumulo
• Ukwehlisa isithunzi sengane, ukuyisabisa noma ukuthethisa ingane ngesihluku.
• Ukunganakekeli ingane
• Ukunganakekeli kahle ingane, ukwenza nje isibonelo: ukungayigezi, ukungayigqokisi noma ukungayiphi ukudla.

IZINGANE ZINELUNGELO LOKUNAKEKELWA FUTHI ZIZIZWE ZIPHEPHILE

Abantu abahlukumeza izingane ziyabazi izingane. Bangaba ngabantu abasebenzisa kabi isikhundla noma ukwethenjwa kwabo yizingane futhi okufanele ngabe izingane bayazivikela. Kungenzeka kube ngabazali imbala, abangani, omakhelwane kanye namanye amalungu omndeni. Nokho, lokhu akusho ukuthi bonke abantu abethenjwa yizingane bayazihlukumeza. Izingane zisesimweni esibucayi ikakhulukazi ngezimpelasonto nangamaholide ngesikhathi zizodwa ekhaya. Abazali nalabo abazinakekelayo kufanele njalo bahlale bazi ukuthi izingane zabo zikuphi futhi zinobani. Izingane nabazinakekelayo kufanele njalo benze lokho okuzohlomulisa ingane. Ukuvikelwa kwengane kuqala ekhaya emndenini.

UHLELO LOKUVIKELA IZINGANE.

Tshela omunye umuntu:

• Uma usaba, tshela umuntuomthembayo.
• Uma kukhona umuntu vele osekuhlukumezile, ungamvikeli zivikele wena - mcebe.
• Uma abantu bengakukholwa, tshela omunye umuntu.
• Yiya emtholampilo utshele uMhlengikazi okufanele athathe izinyathelo.
• Qhubeka njalo utshele abantu ngalokho okwenzekile kuze kube khona okukholwayo, othatha izinyathelo zokukuvikela.

QAPHELA, PHEPHA

Yazi ngamalungelo akho njengengane.

Unelungelo LOKWENQABA uma kukhona umuntu okwenza okuthile noma osho izinto obona ukuthi azilungile(ngisho nabazali bakho). Lokhu kumbandakanya umuntu ozama ukuthinta umzimba wakho noma okucela ukuthi wenze okuthile okungakuphathi kahle.

Funda ngezinto ongaziqondi kahle njengocansi, iNgculazi, ukuthi izingane zizalwa kanjani, ukuthi yini ukuhlukunyezwa ngokocansi, ngokomphefumulo nangokomzimba.

Ingane eqaphelayo yingane evikelekile kahle. Zithande Zigqaje ngomzimba wakho, ngowakho impilo yakho yonke. Zihloniphe uhloniphe nabanye Ihloniphe impilo yakho - ukhethekile.

Zithembe

Uyintombazane noma umfana, ucebile noma umpofu, ukhuluphele noma uzacile - ziphathe ngokuzithemba Yazi ukuthi ungahamba ugcinephi nomunye umuntu, uyazi futhi nemikhawulo abantu abanayo ngawe. Mantombazane nani bafana, vikelanani nimelane kulokho okulungile. Khumbulani, ukunqanda ubugebengu obubhekiswe ezinganeni ngumsebenzi wawo wonke umuntu.

Khumbulani, ukunqanda ubugebengu obubhekiswe ezinganeni ngumsebenzi wawo wonke umuntu.

UMA NGABE UHLUKUNYEZIWE NOMA USOLA UKUTHI INGANE IYAHLUKUNYEZWA, SHAYELA AMAPHOYISA ASENINGIZIMU AFRIKA UCINGO: